Gajil,Gecil,گجيل
 

گجيل

 
شعر - ناغيل
يازيلار - مقاله لر
اسماعيل جميلينين شعرلري


افسانه دي شمشيره دايانمازسا، آزادليق

چكديكده قيلينجين،
جوشدوقدا دنيز تك،
توفان كيمي اورمانلاري تيترتديگي آنلار
دوشمن كيريييب آغلادي مسكين.
باش ايدي غلام تك اونا سلطانلار، اوزانلار،
زحمت چكن انسانا اؤلوم حؤكمو يازانلار،
مللتلرين ديللرينه قبر قازانلار...

قؤيدوقدا قينا اودلو قيلينجين،
سونبوللري بيچديكده يايين ايستي چاغيندا،
دوشمن دونه رك آسلانا گلدي،
سونگو يله اونون زحمتينين ياريسين آلدي،
آج قالدي قيشين شاختالي، چووغونلو چاغيندا،
بير سؤز دئمه دي سينه سي ميس تك يانان
      / آسلان
      / كيمي انسان!!
سونگويله بوتون ثروتيني چالدي، آپاردي،
زنداندا چوروتدو
آسلانلاري بير- بير،
حؤكمون ده يوروتدو،
بئينين ده قازيب اينجي قوپارتدي،
تاريخيني آلت- اوست ائله ييب يازدي تازاشدان؛
بير آبيده ده تيكمك اوچون وئرمه دي ايمكان؛
اولكيلري ائيله دي ويران...
دؤزدو گئنه ده سينه سي ميس تك يانان
       / آسلان
       / كيمي انسان!!
قلبينده سه عصيان.

بير گون ده گليب ايسته دي توپراقدان
       / آييرسين اونو دوشمان
بير فيكره داليب سوسدو بو آسلان
       / كيمي انسان
       / و دوشوندو:
آرخامدي بو توپراق،
شنليكده بوساطيم دؤشنن يئر،
پيس گونده داياق،
       / همده سيغينجاق
توپراق
/ اگر اولمازسا نه ييم وار و نه يم من؟
توفانلي دنيزلرده اوز ه ن بير اؤلو يارپاق!
مين بير اولو بابك كيمي اجدادلاريم آنجاق
بوردا ياشاييب، عؤمر سوروب، گؤمدورولوبلر
چيخسام وطنيمدن،
هاردان آلارام قان،
هاردان گله جك جسميمه قووت،
       / و جسارت
       / و همييت؟
هاردا قازيلار سون بئشيگيم بس؟
كولي دئير اولاديما هر كس...
نفرت دولو گوزله
بير دوشمني سوزدو،
((هئركول)) كيمي جانلاندي گؤزونده
ايستير آياغين يئردن اوزوب آنتئيي بوغسون...
داغلار گوجو حيس ائتدي اؤزونده،
قلبينده قاني كوكره دي، جوشدو،
قيزغين شئره دؤندو
سانكي بو سفر سينه سي ميس تك يانان
        / آسلان
         / كيمي انسان!!
آيدينجا گؤزونده آليشان شعله گؤروندو؛
كين اؤرتوگونه سانكي بوتون وارليغي بير آندا بوروندو.
سيخدي كوره گين توپراغا دوشمنله ديديشدي.
قوپمام- دئدي- اؤلسم ده بو يئردن،
           / بو دياردان.
كئچميش بابالاردان
           / آتالاردان
ارثيمدي بو داغلار،
بو بولاقلار،
بو اتكلر،
بو چيچكلر...
اوولاديما ارثيم گرك اولسون بو دياريم.
توپراقدي منيم دارو نداريم.
داغلارجا فلاكت،
عمانجادا موحنت
و اذيت
بير دمده بئله آغناسا گر اوستومه قوپمام...
آز قالدي جوشا سينه سي ميس تك يانان
        / آسلان
        / كيمي انسان!!
قلبينده يامان چاغلادي عصيان
توفانلي دنيز تك!!

كئچميشلري خاطيرلادي دوشمن،
بير واخلاري كي، سينه سي ميس تك يانان
      / آسلان
      / كيمي انسان.
چكميشدي قيلينجين...
- قوي جوشماسين عمان-
       / دئيه، قلبينده جه آرام،
دوشمن گئري دؤندو...

اولدو سحر، آخشام،
كئچدي نئچه ايام،
/ قوجامان سينه سي ميس تك يانانين آتشي سؤندو
سؤندو گئنه گؤزلرده قيغيلجيم
 / و دورولدو
گؤزلر كيمي هر ياندا بولاقلار
  / و ايشيقلاندي چيراقلار؛
سونبوللري ده بيچدي اوراقلار؛
قيشلار دولانيب، كئچدي سازاقلار؛
بير آزجا گولوش  گؤردو دوداقلار؛
دينجلدي آياقلار
 / و باجاقلار،
هر ياندا بوساطين دؤشه دي دوزلره يازلار،
آذر گوزلين چؤلغادي نازلار،
ديللندي ياماجلاردا يئنه نغمه لي سازلار،
عزيزيم گولوم واردير،
وفالي ائليم واردير،
وطنيم تالانديسا،
وارليغيم، ديليم واردير...

توتدو گؤزونو اويغو ايلان چالميشين، آمما
بير آن دا بئله ياتمادي دوشمن.
هر گون يئني بير حيله دوشوندو،
هر ايل يئني بير دوندا گؤروندو،
عاريفلريني توپلاياراق، قوردو ييغينجاق،
تا بلكه تاپا مينمه گه بير تازا اويونجاق.
سون تدبيري ساده:
لازيمدي ده گيشسين
زحمتله بوتون وارليغي يوغرولموش اولان،
   / سينه سي ميس تك يانانين اؤزلوگو آنجاق.
گر اؤزلوگون آلساق،
گر منليگيني، كيمليگيني آلساق اليندن،
توپراق دا بيزيم دير،
داغ، دوز، دره، اوتلاق دا بيزيم دير،
تكجه نه كي نعمت، نه كي معدن،
نعمت يارادان قول، قولوموزدور؛
آلساق ديليني، اؤزلوگو يوخ بير قولوموزدور...

دوشمن ياساق ائتدي، وئره رك بير اولو فرمان
زحمتله سعادت آرايان،
    / سينه سي ميس تك ياناني دوغما ديليندن.
انسانليغي لذتله قارين، پولدا بيلنلر،
قارين ايزي ايله سورولر تك سوروننلر،
معنادا دئييل، ظاهيرأ اينسان گوروننلر،
اؤز وارليغين افسانه سايانلار،
اينسان كيمي لر بال كيمي شيرين ديلين آتدي؛
نعمتلره،
  / لذتلره،
   / شهرتلره،
    / چاتدي.
انسانليغيني بير قارينا، بير پولا ساتدي.
آيريلدي ديليندن،
آيريلدي ائليندن.
كئچميش كيمي لاكين قوجامان
    / سينه سي ميس تك يانان
     / آسلان،
دايم باخاراق غملي گئدنلر داليسينجا،
انسانليغي، مليتي جوشدو،
قلبينده قاني جوشدو و داشدي،
جسمينده گوجو حديني آشدي،
ووردو بئلي قووتله بير آرشين يئره كئچدي،
خوشبخت ليگين تاپدي يئريندن
   / و تريندن.
يئللر پوزا بيلمز قوجامان داغلارين
   / آيديندي ووقارين.
قانون طبيعتدي درين كؤكلو چينارلار،
يارپاقلاريني توكسه ده توفاندا، سازاقدا،
آزاد گونشه دوغرو دمادم بوي آتارلار،
مؤحكمدي كؤكو چون آنا توپراقدا،
   / بولاقدا،
اؤلموش قورو يارپاقلاري
   / سالماز چيناري
   / ذره جه اولسا ووقاردان، عظمتدن!!
سرسم يئله اويموش
يارپاقلارين آمما،
يئللر گومورر هر بيرين آخير
بير گوشه ده، بير قبرده ايتگين.

بئش ياپراغيله اؤزلوك آلينماز،
قيرخيلسا توك، اينسان كيشيليكدن كي سالينماز،
لازيمدي دگيشسين ديلي بو سينه سي ميس تك يانانين
سون امريني دوشمن بئله وئردي.

دوشمن گله رك سؤيله دي:
آت دوغما ديلين بير كره، حتي
آت اسكس شعورون
   / و دوشون تكجه منيم تك.
سن
   / منسن
     / ازلدن.
مجبور ائله ييبلر كي، اوزاقلاشميسان اؤز دوغما ديليندن.
بيگانه ديلين بوشلا سن، ال چك...
فيكره دالاراق سوسدو بير آن
    / سينه سي ميس تك يانان
     / آسلان
      / كيمي انسان!!
مومكون دو مگر آيريليم اؤز دؤغما ديليمدن؟ 
مومكونسه ده، آخير نه سببدن؟
ديلدير مني آنجاق ائله ين
    / من!!
اؤزگه كيمي، بيلمم، نئجه مومكوندو دوشونمك؟
مومكونمو قارانليق اولا شيمشك؟!
مومكوندو مگر ((آب)) دئييم من سو يو گورجك؟!
ائتميش، دئمه لي، اؤزلوگومو، وارليغيمي ايندي نيشانه.
قويمام آتا، قويموشسادا دوشمن بو اوخون ايندي كامانه.
ساكيت دنيزي چالخادي توفان.
هر مؤحنته دؤزموش قوجامان
     / سينه سي ميس تك يانان
      / آسلان
       / كيمي انسان!!
يوخ، يوخ- دئيه رك، چكدي قيلينجين
ديل؟؟!!
   / شوخلوق بو دئييل، بيل.
شمشيرلره چئوريلدي اوراقلار،
عمان كيمي چالخاندي ياخينلار و اوزاقلار،
سرنيزه يه دؤندو گوزل اللرده داراقلار...
دوشمن كيرييب آغلادي مسكين؛
آيريلدي خيالدان،
بير امر- ماحالدان،
هم بيلدي كي، اولماز بير ائلين
   / اؤزلوگونو آلماق اليندن.
اولماز كي، آييرماق بير ائلي دوغما ديليندن.

بير گون دئدي اوولادينا ياي فصلي بيچينده:
كئچميش بوتون عؤمروم تر ايچينده؛
من قويماميشام يوغرولا بير گون خميريم اؤزگه تريندن،
اولسون گؤزوز آنجاق ايشينيزده، قولونوزدا،
مؤحكم دايانين اؤز يولونوزدا...
آرديندا و لاكين، امه گين اولماسا شمشير،
هر گون چؤره گه دامجيلايار قان.
هر گون گؤره جكدير شرفيز بير يئني تحقير،
هر گون چكه جكدير باشينيز بير يئني ذلت،
تحقير ائده جك ساغ، ووراجاق سؤل سيزه تهمت،
يوردوز اولاجاق دوغما اؤز اولاديزا غربت،
هر كس سيزه ايستر اولا سلطان،
    / آغا، سرور،
دايم آج اولار قارنيز، اليز لئيك خميرده،
شنليك بينالي آتلي اولار، خلق پياده،
ياس حالي اولار ائلده سراسر،
غربتده و دوستاقدا حياتين چورودو مرد اوغوللار،
وئرمز اولارا ياد گوجو مئيدان،
قولدورلارين آغزيندا اولار
آزادليغيز، حقيز،
تحقير اولار هر گوشه ده، هر وقتده انسان،
بيگانه لر اوينار ديلينيز، وارليغينيزلا،
سرمستليگيز، شادليغينيزلا،
اولماز آدينيز دونيادا ميللتلر ايچينده،
شهرتليز ايتر همشه شهرتلر ايچينده،
قلبيز كيمي ويرانه قالار دوغما دياريز،
يول گئتسه ده ائل، كؤلگه كيمين قويماياجاق ايز،
قارين سوراغيله سورولر تك گئده جكسيز.

اللرده اوراقلار
بير آغزي قيلينج اولسا و لاكين،
دوشمن ده سيزه دوست اولاجاقدير،
هر كس ائده جكدير سيزه حؤرمت،
ائللر سيزي اينسان ساياجاقلار،
چون قايدادي شمشيره دايانميشدير عدالت
     / و شرافت.
يوردوزلا برابر
آزادليغيز، حقيز اولاجاق اؤز الينيزده،
تحقير اوزو گؤرمز ائلينيزده،
     / ديلينيزده.
دونيا تانييار سيزلري ملت،
ائللر ائله ير ملته حؤرمت.
حقين قيلينجي وارسا اگر حق تانييارلار.
قدرتلي و آماده گر اولسان،
دايم سني اينسان سانايارلار،
هئچ كيمسه ده جرات اولا بيلمز
      / آغاليق فيكرينه دوشسون
       / سنه بير آن!!
بلي، بالالار، قوي قالا دايم قولاغيزدا
ايش وقتي ده شمشيرينيز اولسون قوجاغيزدا
افسانه دي شمشيره دايانمازسا آزادليق!!...
هئچ وقت قينا قؤيما قيلينجين!

محمد تقي زهتابي

 

گجيل سايتي ركلاملاري وئريلن سايتلارين محتواسيندان سوروملو دئييل.
 بو ركلاملار ايراندا ، آذربايجان سايتلارين آرتيق راق تانيتديرماق اوچون بوردا ويريليب ديلار.


 


گجيل سايتي لينکي وئريلن سايت يا يازيلارين محتواسيندان سوروملو دئييل.

E-mail : webmaster@gajil.20m.com
Copyright © 2003-2004.