|
جنوب حسرتي
1)
يئنه شاعير اوره
گيم دؤندي قانا
باخيرام دردلي آرازدان اويانا
ياغير اطرافه ديليمدن اودلار
گورورم قاندا اوزور جلادلار
اؤلدورور باجيمي، قارداشيمي
توكمه رم بير داها من گؤز ياشيمي
انتقام نغمه سي وار كؤنلومده
خالقين اؤلمه ز سسي وار كؤنلومده
اوردا بوكموش بئليني درد آنامين
قارا گونلر گئچيرن مرد آنامين
قانلي اللر اوزانير ساچلارينا
قلبي داشلارسا، بو گوز ياشلارينا
باخاراق، هي قوپارير قهقهه لر
آچيلير اوردا فغانلارلا سحر
ديل آچانلار چورويور زينداندا
حق دئيه نلر يوخ اولور بير آندا
هر باخيشدان يئنه غم- غصه ياغير
چوخ آغيردير وطنين دردي، آغير!
من دئميشديم اؤز اوره ك قارداشيما
بيزه صادق، او ديله ك قارداشيما:
آچيلوب گول كيمي گولسه ن، گوله رم
وطن اوغروندا گر اؤلسه ن، اؤله رم
قارداشيم! دونمه رم اؤز آنديمدان
تيتره يير آتديغيم هر آدديمدان
مني سندن، سني مندن آييران
چوخ اوزون سورمييه جكدير هجران!
بير جانيم وار، سنه قورباندير اودا
نئجه گولسون اوره گيم؟ قاندير اودا
او گوله ر منجه وصالينله سنين
ياشايير چونكي خيالينله سنين
نه سن اؤنسيز، نه او سنسيز ياشاماز
آذر اؤلادي وطنسيز ياشاماز!
دوت اليمدن كي منم آرخا سنه
قازاناق بيرگه بير آغ گون وطنه
يادلارين اوندا كسيلسين نفسي
بوروسون هر طرفي نغمه سسي
2)
يوخ خزاندان اؤ
طرفلرده بهارين فرقي
چوخ بويوكدير بو ديارلا اؤ ديارين فرقي
بورونوب ماتمه كندلر وشهرلر، اؤليدير
ائله بيل اوردا حياطلر- كوچه لر، قان گؤليدير
من خيالا او سئوينجسيز كوچه لردن گئچيره م
كينلي گؤزلرله باخوب دشمني- دوستي سئچيره م
باخيرام دار آغاجيندان آسيلان قارداشيما
دگمه جلاد، دئييره م، دگمه او قان قارداشيما
منه باخ، قؤرخ غضبيمدن، اؤني تك گؤرمه، چكين
دردلي قلبيمده بو گون دالغالانير سؤنسيز كين
سؤلدوروب اؤز نفسينله باغيني، باغچاسيني
وطنين ماتمه سالدين اؤ گوزه ل پارچاسيني
اؤني بير قول كيمي بير وقت چوخ آلوب ساتدين سن
ائله ظن ائتمه كي اؤز ايسته گينه چاتدين سن
گؤرمه ييرسنمي كؤنوللرده جوشان عصياني؟
سانما مستملكه سن شانلي آذربايجاني
يئته ر اؤلكه مده چكوب قهقه لر اويناديغين
ايچيروب حق باغيران خلقه زهر، اويناديغين
چؤخ گوونمه، يئته ر، آرخاندا دوران دولته گل
دئمه سن ((كؤرپه اوشاق)) دردي جوشان ميللته گل
سن منيم قارداشيمين قاتلي سن هر يئرده
اؤرته بيلمه ز بو جنايتلري هئچ بير پرده
انتقام آل! دئيير هر شانلي شهيدين قبري
قهرمان ميللتيمين، دينله تؤكنميش صبري
اؤز ديليندن اؤني محروم ائله دين اي جلاد
بيلمه ييرسن بئله گئتمه ز قوجا دونيادا حيات؟
بيلمه ييرسن اؤ بير گون يئنه زنجيري قيرار
نملي زنداني اوچوردوب يئني كاشانه قورار؟
اينديدن باش چكيره م دوستا، قوهوم قارداشا من
گزه رك قلبي يارا يورديمي باشدان- باشا من
يازيرام قلبيمه بير- بير سنين ايتديكلريني
بيليره م، گون گله جك حق دوتاجاق اؤز يئريني!
دوتوب ائللرسه ياخاندان چكه جك محكمه يه
اؤندا هئچ كيمسه سنه يئتميه جكدير كومگه
انتقام اؤردوسينين عسگرييم منده، ائشيت
اولماييب، اولماياجاقدير كؤله بئش ميليون ايگيد!
سسله ييب دوستلاريمي، ائولري بير- بير گزيره م
سسيمه هاي وئره ن اولمور، دوتولوبلار، سزيره م
هر خياواندا يئنه قوپ- قوري اللر اوزانير
آغاجان! بيرجه قران وئر، دييه ديللر اوزانير
قارا شمسيه لي بير كيمسه يه... هيهات هيهات
او گئچير داش كيمي سس سيز... اونا ياددير بو حيات
سككيز- اؤن ياشلي اوشاقلار كي، بهاردير منجه
گون چيخاندان چكه رك گون باتانا ايشكنجه
دونير اؤنلار الي بؤش، جيبلري بؤش، ائولرينه
بورونوب كهنه جيريم- جينديرا پالتار يئرينه
احتياجين گوريره م دوگمه ديگي بير قاپو يوخ
چرخي دونموش شهرينسه، يوزي آجدير، بيري تؤخ
يئنيدن انسان اوجوزلاشدي، چوره ك اولدو باها...
يوخ، كؤنوللر دؤزه بيلمه ز بو آغير درده داها!...
منجه بير گون گله جكدير كي بوغم كارواني
غضبيندن جوشاراق، آنديراجاق عماني
بوغاجاق دشمني، آيدين دييه جك ايسته گيني
قالديروب گؤيلره قاندان قيزاران كوينه گيني!
سليمان رستم
1947
|
