|
|
حيدرعمواوغلو
تبريزدن مرنده امانت گئتدي او بومبي حيدرخان تهيه ائتدي
مشروطه انقلابينين بويوك سيماسي حيدرخان عمواوغلو نون اجدادي
آذربايجانين سلماس شهريندن اولموش. او بيرينجي تحصيلاتين ارمنيستانين گمري شهرينده
باشلاييب وتحصيلاتيني تفليس وباكي شهرلرينده باشا چاتديريب.
1319ه. ق ايلينده باكيدا برق مهندسليغيندا ايشه باشلادي. حيدران ان گنج
چاغيندان سياسي ايشلره قوشولوب و1900م ايليندن نريمانوف ايله تانيش اولماغيله
((اجتماعيون عاميون)) قورقوسونون عضوي اولورو سونرا بو قورقونون دستوريله تبريزين
((اجتماعيون عاميون)) قورقوسون علي مسيو نون رياستيله قورور.
مشهد شهرينده امام رضانين صحنينين برق كارخاناسين مظفرالدين شاهين دستوريله يولا
سالير و او شهرده بير پارا سياسي ايشلره مشغول اولور اما((اجتماعيون عاميون))
قورقوسونون شعبه سين اوردا قورماقا امكان تاپمير.
حيدرخان تهرانا گئديب و اونون كومكيله تهراندا نئچه خطرلي مسلحانه عمليات اولونور و
استبداد باشچيلارين قورخويا سالير، دولت وزيرلرينين بيرينين ائوينه بومب آتماق،
علاالدوله نين ائوينه بومب آتماق، و اتابك اعظمين تروري كي عباس آقاتبريزي نين اليله
اولدي بو عملياتلاردان ساييلير.
حيدرخان توركي، فارسي، روسي، انگليسي و فرانسا ديللرينه تانيش ايدي . نئچه يول
ايراندا توتولوب و دوستاق اولموشدي اما اوز يولوندان ال چكمه ييب و مبارزه
سينه دوام وئرميشدير. ستارخانين تبريزده قياما باشلاماسيله حيدرخان تبريزه گليب
و تبريز قياميندا بويوك نقش ايفا ائتميشدير او جمله دن شجاع نظام مرندي و اونون
اوغلونون اولدورولمه سيني دئمه ك اولار.
حيدرخان خوي شهرينده بوغداني احتكار ائدنلرين بورنون يئره سورتوب و خوي اهلين
اولارين اليندن قورتارير. 1288 گونش ايليندن كي تهران مشروطه
مجاهيدلرينين اليله فتح اولونور حيدرخان تهرانا گلير و بير عده آزادي سئونلرين
كومكيله ايرانين دموكرات فرقه سين تشكيل وئرير آما اونا بير پارا اتهاملار ويريلير
و حيدرخان مجبور اولور ايراندان چيخا. او شوروي نين انقلابينا قدر شوروي ده قالير
و اوردا سياسي ايشلره مشغول اولور.
1919م ايراندا اوچ بويوك انقلابي حركت كي دئمه ك اولار مشروطه انقلابينين
ادامه سي ايدير باشلانير، كلنل پسيان خراساندا، خياباني آذربايجاندا وميرزا كوچك
خان گيلاندا.
حيدرخان بو قياملارين آراسيندا بيرلشمه ك ياراتماق اوچون بو يئرلره نماينده يوللايير
اما بو نماينده لر او وقت خراسان ايله آذربايجانا يئتيشيرلر كي كلنل پسيان ايله
خياباني نين قيامي اياقدان توشموشدي. حيدرخان ميرزا كوچك خانا كومك ائتمه ك اوچون
گيزلينده گيلانا گلير اما بو ماموريتده ارتجاعي و آللانميش انسانلارين اليله شهادته
يئتير.
بو انسانين فداكارليغي و مظلوملارا داياق اولماسي اوني خلق ايچينده بويوكليغا يئتيرير
و اونون حقينده چوخلو باياتيلار و قوشمالار قوشولور.
عمو اوغلو گلدي خويا
خويلولار قرار قويا
يئتيملرين قارني دويا
ياشاسين گوزل عمو اوغلو
_______________
عمو اوغلو مينيب فايتونا
تومار وئريب اوز آلتينا
چورك يئنيب يوز آلتينا
ياشاسين گوزل عمو اوغلو
_______________
راستابازارلار راستاسي
گلير مجاهد دسته سي
عمو اوغلودور سر كرده سي
ياشاسين گوزل عمواوغلو
_______________
باققال- بازار چيراق قويدو
كاسيب باخدي قارني دويدو
هر بير ايشه قانون قويدو
ياشاسين گوزل عمواوغلو
نظر لرينيز!