|
|
ارك قالاسي ، امام خميني مصلاسي آدينا احيا اولونور!!
تبريز شهرينين ان قديم و
طنطنه لي اثرلرينين بيري اوجا ارك قالاسي دير. بو بويوك اثر كئچن چاغلاردان
بير شاه اثر ساييلير و قديم تاريخ كيتابلاريندا اوندان چوخ آد آپاريليب.
تاسفيله بو اثر تبريزين اوبيرسي باستاني اثرلري كيمي ساييلماز زلزله و خارجي
يوگوروشلرين اثرينده آرادان گئديب و تكجه اونون يئكه ديوارلاري و اوجا محرابي
قاليبدير كي او محرابي كسري طاقيندان بويوك راق يازيبلار. بو بنا قاجار
زمانيندا اسلحه انباري اولموشدور و عباس ميرزا اونو اوز دارالحكومه سي ائديب
و دولتي مهماتي اوردا ساخلاميشدير.
تيريزه گلن بويوك تاريخچيلر و دونياگزنلر اوز يازديغلاريندا اركين عظمتيندن
سوز آچيب و اونو آلقيشلاييبلار. ((ابن بطوطه)) 727اينجي گونش ايلي سولطان
ابوسعيد بهادرخان زمانيندا تبريزه گلنده تبريزين بازارين و اركين دونيانين
بويوك اثرلريندن بيليب و تبريزين گوزلليغلاريندان چوخلو سوزلريازيب.
((حمدالله مستوفي)) بويوك اثري ((نزهت القلوب)) دا تبريزين ارك بناسين
ايراندا تايسيز بير اثر بيليب و بو بنادان اوتور مفصل توضيح يازيب.
كاتب چلبي، شاردن، نادرميرزا، وحشري و... لرده اركين موردينده چوخلي سوزلر
يازيبلار. بو يازيلاردان بئله نتيجه آلماق اولاركي بو بنا اوز عصرينده عظيم
و بويوك اثرلردن ساييليردي و اونون دوروبرينده گوزل عمارتلر و باغلار
وارايميش.
بوبنا مشروطه زماني ستارخانين مهمات انباري اولوب و روس ايله تبريزين
دويوشلرينده روس توپلاري اركين ديوارلارينا چوخ اثرلر قويوبلار.
اسلامي انقلابين اوانيندا ارك، امام خميني مصلاسينين احيا اولونماق آديله
بولدوزرلر آلتينا گيردي و اونون اطرافيندا قالان سينيق سالخاق ديوارلارادا
رحم اولونمادي و اركدن تكجه اصلي بنا قالدي. خالق دشمني تبريزين آمفي تياتر
سالونونادا كي بوتون اورتاشرقده تايي يوخ ايدي رحم ائتمه ييب واونو دا
بولدوزر آلتينا وئرديلر. شايد اگر او زمان بو ايشين قاباقيندا دوران
اولمايايدي و او نئچه نفرده كي بولدوزرلرين قاباقين ألديلار اولمايايديلار
ايندي اركدن بير نيشان قالمايايدي و تكجه عكسلرده و تاريخ كيتابلاريندا
اوندان بير آد تاپماق اولايدي.
اركين بوگون كي وضعي او زماندان ياخشي دئييل، ايللر بويو ايدي كي اونون دورد
طرفيده ديوار ايدي و ارك ديوارلار آراسيندا دوستاق ايدي و تبريزليلرده اركين
بو وضعينه عادت ائتميشديلر. اما نئچه ايل اولار كي آذربايجان كولتورونون
دوشماني بير آيري پالتار ايچينده ارك قالاسين آرادان آپارماقا نقشه چكير.
اولار كي بيليرلر مستقيم يولدان نتيجه يه يئتيشمييه جكلر و تبريزليلر
قويمازلار بير داها بولدوزرلر اركين ديوارلارين ييخا، آيري بير حربه ايله
اونا ضربه ويرماق ايستيرلر.
گوي مچيدين يانيندا و اوردا تاپيلان باستاني گورلارين اوستونده دوزه
لن((مجتمع فرهنگي- تجاري!!!)) دان سونرا ايندي اركين يانيندا و اونون
ديوارلارينا ياپيشان بير داها ((مجتمع فرهنگي- تجاري!!!)) دوزه لير. اگر او
طرفلره يولوز دوشسه اركين يانيندا دميردن اولان بير گودنسيز ساختمان كي نئچه
ايل دير كارگرلر اونون اوستونده ايشليرلر گوره جكسيز. شايد اولارين قصدي بو
ايشدن بودوركي اركين عظمتين بو ساختمانين داليندا ايتيرسينلر و تبريز اهلي
گئت به گئت اركي اونودوب و ارك تاريخه قووشسون!
آذربايجان ميللتينين دشمنلري و اونون مدنيت وزنگين فرهنگينه خور باخانلار
بوني بيلمه ليديلر كي ارك تبريز شهرينين باش اوجاليغينين نيشانيدير و بو
يئددي يوز ايلده چوخ شاهلار، خانلار و ارتشلر گوروب اما بير داغ كيمي اوز
يئرينده دوروب و بو فتنه لري باشيندان سوووب.
ارك آذربايجانليلارا مقدس آزادليق وباش اوجاليق توتمي ساييلير وبو ساختمان
استبداد توتمي، و آذربايجان ميللتينه گوندن آيديندير كي استبداد قورقوسونون
عومرو گونشين قاباقيندا اولان بوز كيمين دير اما خالق توتمي تاريخ بويوجا
ياشار، حتي اگر ييخيلسادا هر اوركده بير ارك و بير آزادليق ايشيلتيسي ياشاياجاق.
بو باره ده كئچميش يازيميز : ارك قالاسي سيزيلدايير . . .
نظر لرينيز!