بابك غيرتي- بابك ناموسو

عشقين اورك لرده، آدين ديل لرده،
شهرتين ائل لرده،جار اولدو بابك.

آزادليق بايراغين آلاركن اله،
دونيا معتصمه دار اولدو بابك

اوخون نشان آلدي اوسهلين گوزون،
ساراي لار تيترتدي مين لر حق سوزون.

دهشت دن ايتيردي معتصم اوزون،
عزمينله دوشمنين خار اولدو بابك.

پير بابادا چنار چاتدي دادينا،
قوينوندا يئر وئردي ائل قوچاغينا.

قارتال ايگيت،قربان اولوم آدينا،
آدين لا حق ديوان قورولدو بابك.

هاردا بير قوچاقدان آد آپارسالار،
اوردا گوزوموز سني آختارار.

سونمز ووقارينا باش اگدي داغلار،
سنه ناموس-غيرت، يار اولدو بابك.

محرم قاراداغلي