|
|
عاشيق حسين جاوان
ميكاييل اوغلو حسين 1295نجي گونش ايلينده قاراداغين گرمه دوز
ماحالي نين اوتو كندينده آنادان اولموشدور.حسين آتاسيني چوخ ائركن ايتيرميش، عائله آغيرليغي آناسي زهره نين چيينينه
دوشموشدور. اوناگوره ده، عاشيقين عائله سي قوزئي آذربايجانا كوچموش و ايكي ايل آغ
دامين شرف خانلي كندينده ياشاميش، سونرا قاسيم اسماعيل اوو رايونون دلمحمدلي كندينه
كوچموشدولر.
حسين اوشاغليقدان ساز و سوزه علاقه باغلاميشدي و همان وورغونلوق تاثيري كولگه سينده
او، 11ياشيندا ايكن بيرمدت عاشيق علسگرين قارداشي اوغلو عاشيق موسي يا شاگردليك
ائتميشدير. سونرالار عاشيق بير اوستاد كيمي ايرانا قاييتميش و گونئي
آذربايجانليلارين توي مجلسلرينين بزه گي اولموش.
عاشيق حسين جاوان 1319نجي ايلده ن اساس ياراديجيليغا باشلاميش ايلك شعرلرين
((فرمان)) وسونرالار ((جاوان)) تخلصوايله يازميشدير.
عاشيق حسين 1324نجي ايلده دموكرات فرقه سي نين ايش اوسته گلن چاغلاري اونون فعال
عضولريندن اولموش و اوز كسگين شعرلريله طاغوت رژيمينين عليهينده دورموشدور و فرقه طرفينده ن عاشيقلار بيرليگينين باشچيسي اولور.
اما بو باشچيليق چوخ چكمه دن 1325نجي ايلين 21 آذرينده شاه قووه لرينين طرفيندن فرقه
داغيليب، فرقه باشچيلاري هره سي بيرطرفه قاچديقدان سونرا، حسين جاواندا تبريزده باش
ساخلايا بيلمه ديگي اوچون كندلرينه گئدير. سوراغيندا اولان دوولت مامورلاري عاشيغين
تعقيبينده اولورلار و عاشيق نهايت قوزئي آذربايجانا گئدير.
عاشيق بو زامانلاردادا ياراتماقدان ال چكميري و آذربايجان عاشيقلارينين بير، ايكي، اوچو و دوردونجو قورولتايينين نماينده سي اولموشدور.
1329 نجي ايلدن باشليياراق بير- بيرينين دالينجا عاشيقين بير نئچه كيتابي چاپ
اولموشدور:
1329 دا ((عاشيغين آرزولاري))، ((آزادليق ماهنيلاري))، 1332 ده ((شعرلر))، 1335 ده ((صدفلي ساز))، 1338 ده ((قوشمالار))، 1341 ده ((شعرلر))، 1345 ده ((دانيش تئللي
سازيم))، 1358 ده ((باهاركيمي)) و...
كتابلاري آد آپارماق اولار.
عاشيق حسين جاوان عومور بويو وطن حسرتيله و وطنداشلاريله گوروش حسرتيله ياشاميش،
اما تاسفلر اولسون كي عاشيق اوز آرزي سينا چاتمادان 1365نجي ايلده گنجه شهرنين قاسم
اسماعيل اوو رايونوندا ابدليك حياتا گوز يومموشدور.
قايناق :پرويز همت جو نون يازيلاري
ناكام اولمه ره م
دويوشلرده بركيميشم، پيشميشه م قورخو ندير، اولوم ندير، بيلمه ره م
آنامين سودونه من آند ايچميشم وطن
آدين اوره ييمدن سيلمه ره م
آزادليق اوغروندا قانيم توكولسه مزاريمين اوستوندن يوللار چكيلسه
ساچلاريم آغارسا، بئليم بوكولسه دوشمنه باش اييب سجده قيلمارام
شيرين آرزولاريم يئرين آلماسا
وطنيم ذلتدن آزاد اولماسا
خالقيم سئوينمه سه، ائليم گولمه سه اوره كدن شاد اولوب منده گولمه ره م
شفق اولوب اوره كلره توكوللم چنار اولوب يوللار اوسته اكيللم
بوداغ اولوب يارپاغلارا بوكوللم شهرت جبه سينه من بوكولمه ره م
چيخيب ساوالانا يوردوما باخسام تبريزين كوكسونه اولدوزلار تاخسام
ظفر نغمه سيني زيلده ن اوخوسام من((جاوان حسينم)) ناكام اولمه ره م
عاشيق حسين جاوان
نظر لرينيز!